Garo Students’ Union (GSU) Gasuapara Regional Unit, Mongolbar salo a∙dokni Skotong Minister Pa Conrad K. Sangma aro Baghmara-ni MLA Pa Kartush R. Marak ko Shillong-ona re∙ange grongeaha. Uamang Gasuapara jolni chadamberangna dingtangmancha kal∙chakram biap, Multipurpose Indoor Sports Hall ko rike on∙china lekka sedoe dabianirangko dakangaha.
Indakgipa dal∙gipa kal∙chakram nokko tarie on∙genchimode bang∙a chadamberangna kal∙susaanio tang∙dodapani aro be∙en bimangko an∙senge rakkina dakchakani ong∙an baksa bang∙a chadambe bi∙sarang an∙tangtangni changa sapaniko mesokna chol ong∙gen ine GSU Gasuapara Regional Unit, Skotong Minister-na lekka seachi mol∙molangaha.
Batanggimin salrango Gasuapara sima-ari jolrango songdongenggipa manderang buringni mongmarang bang∙en re∙barongani gimin namen neng∙nikani aro kenchipchipe dongna nangenganina, ka∙namgijagipa matburingrangoni chel∙chakna aro naljokataniko man∙a gita, ‘Wildlife Range Office ko Gasuapara-o songe on∙china gitaba a∙dokni Skotong Minister-o dabianganiko dakangaha.
