June jani 27 tariko Delhi-ni salgipeng-salaram jolo donggipa Jangpura-o, bilsi 25 ong·gipa Kamal minggipa mande saksa kam ka∙enggipani manggisiko, Meghalaya Advocate General-ni dongchakenggipa nokni brigipa gadangoniko man·aha ine Delhi Pulis parakataha. Ia obosta ong·ani somoio Advocate General noko dongjachim indiba uni nokdangni manderangde gnangchim ine koborna u∙iataha.
A·sel ong·aniko nokni manderang pulis station-na kobor on·atani ja∙mansa uamang biapona sokbaaha. Pulisrangni ua biapona sokon, manggisini ja∙ao aro gitoko plastic buduchi kae palang ning∙ani baksoo donako nikna gita man·aha. Ia mamlani bidingo CCTV camera-rangoniko am·sandianiko dakenga aro so·ota in chanchichipenba badi ka·angaha ine u·ina man·soaha. Iani bidingo name am∙sandianikoba dakanggen ine pulis dolni dal∙batgipa parakataha.
