A∙doko kamrangko bikotaniko tang∙doatna, Conrad Sangma, Don Bosco Technical skul baksa nangrime dakchakgrike kamko ka∙angna, June jani 28 tariko ku∙monganiko dakangaha. Sangma, school-o poraigiparangna matchotani certificate aro kamna ra∙napani chitti ba appointment letter-rangkoba on∙angjolaha.
Sorkarini lak 5 kamrangko dingtang dingtang a∙bao bikotna miksonganiko, MDA sorkari Don Bosco Technical skul baksa bakrime chu∙sokatna jotton ka∙anggen ine Chief Minister aganangaha. Sangma, chadamberangko a∙dokni silroro namroroanina jakkalna uamangni mikkangchi gamchataniko namdapatna chatro chatrirangko tikkelchinaba uni agananio ku∙watangaha.
Sorkari mikkangchi re∙mikkange namgipa ja∙kurangko de∙e, a∙dokna man∙dapani cholrangko sandie manderangni janggi tanganiko tang∙doatna chanchianirangko dakenga ine parakangaha.
