Songsalni namgnina kamko ka∙gipa, Flaming B. Marak a∙doko niam gri koela cho∙anirang batroroanina Justice Brojendra Prasad Katakey (retd) ni jako pakwate badi ka∙aniko dakangaha. National Green Tribunal (NGT) aro court ni indita champenganirangko dakgenchimoba niam gri koela cho∙e badinggiparang batroroaniko namnikjae ua badi ka∙na gita ja∙kuko de∙skaaha. South Garo Hills a∙jani Chokpot C&RD Block ning∙ao ga∙akgipa songrang jekai Jetra, Darengre aro Udugre jolrango niam gri koela cho∙ani kamrang ong∙batenga ine ua parakangaha.
Niam gri koela cho∙ani sakkirangko bang∙a manderang on∙genchimoba sorkari iani bidingo maming nirokataniko dakjaenga ine Marak matnange aganangaha. Indakgipa kamrangara a∙songni niamko pe∙asan ong∙aigija an∙chingni samtangtango donggipa sambolrangko nisiatan baksa a∙dokni man∙a nangnirangko gimatani ong∙a ine ua agandapangaha. Iarangni bidingo ua bakan am∙sandiako dakchina justice Katakey o mol∙molangaha.
