Ja∙a gongee atchigipa manderangna sanna bannaniko on∙agita Turani Holy Cross Hospital-o surgery camp ko a∙bachengatangaha. Ia camp ko National Health Mission ni ning∙ao kam ka∙enggipa District Early Intervention Centre (DEIC) aro Chandramma Dayananda Sagar Institute of Medical Education and Research (CDSIMER) baksa nangrime ong∙atenga.
Ia surgery camp ko ong∙ata da∙o salbonga gapaha aro chu∙gimik sak 48 mang manderang re∙bae sanna bannaniko ra∙angaha ine kobor o u∙ina man∙soaha. Ia namgipa cholko on∙a gita, Bangalore ni sak 6 doctor rang aro Holy Cross hospital ni saksa doctor, unbaksa staff nurse rang dangdike on∙angaha. Ia camp-o re∙bagipa pilak manderangna tangka paisa nanggija sanne on∙an baksa samrangkoba indin sualangjolaha.
