NEIGRIHMS hospital-o gitalgipa kamna rimnapako man∙giparang July 1 tarikoni kam ka∙na a∙bachengataniko man∙e, sak 200 contractual staff nurse-ni kamko gimaatna nangaona sokaha. Ia obostao ga∙akgiparangara bangbatan a∙doktangni jatrang ong∙a jeon chu∙gimik 119 mang post rangko bon∙atna nangaha. Ia kamrangna galna gita 2019 bilsion on∙angahachim indiba a∙gilsak gimiko Corona sabisi gipani a∙selo dontongatna nangsikaaha.
Gital kamna rimnapaniko dakanio Central Reservation policy-ni chamgimino pangchake dakangaha. Ia kamrang sak 231 staff nurse-na aro mittamrang technical assistant ni kamna ong∙a. Kamrangko dingtang dingtang jatrangna suale on∙angaha jeon Schedule Tribe na 17, Schedule Caste na 34, OBC na 62 aro EWS na 23 ong∙a. A∙kangna man∙gijagipa post rang ba Unreserved post dam 95 mang gnang. Gital dake ra∙napako man∙giparang bang∙bata Rajasthan oni me∙asa nurse aro a∙songni dingtang dingtang a∙dokrangoni ong∙a.
