Chief Minister Conrad Sangma, Ganol Hydro Powerplant-oniko bijoli bikotnagita sringgipa silbudurang baksa ge gittam unit-ko nangrimatangaha ine u∙iataha. Ganol chibamaoniko bilsianti 65 Million Units (MU) bijoliko bikotna man∙genok ine uni agananio parakangaha. Chief Minister, bijoliko bikotanio chu∙sokanina kam ka∙gipa sakantiko mittelpilani kattarangkoba uamangna on∙angaha.
Meghalaya a∙doko bijoli bikotaniko dam gittam biaprango da∙o dipet dakenga jean Jaintia Hills-o Leshka, Khasi Hills-o Umiam aro Garo Hills o Ganol dam nikoba bijoliko bikotna da∙o a∙bachengataha. MDA sorkarini a∙doko bijoliko bikotna kamrangko ka∙anio Ganol dam oniko bijoli bikotna man∙aniara dal∙bea chu∙sokani ong∙a ineba Chief Minister aganangaha.
