Revenue and Disaster Management baksa tom∙bimonganio a∙dok sorkari North Eastern Space Applications Centre (NESAC) aro gipin agency rangko gronge mikka kimpretani, chi bana aro a∙a ruronganirangko niksamsoe mikrakataniko on∙a man∙gipa technology ko bikotna mol∙molaniko on∙angaha.
Da∙ororo a∙doko mikka kimpretani, chi bana aro a∙arang be∙dapanichi bang∙a manderangni janggiko gimaatna nanganiko nikani a∙selo, a∙dok sorkari indakgipa technology ko jakkalanichi a∙sel ong∙gnioniko champengatna miksongenga ine Disaster Management-ni Minister Kyrmen Shylla agananga.
Unbaksana den∙a nanggipa bol-waarangkoba nigrike a∙sel ong∙gnioniko champengsona man∙a gita Forest aro gipin department rang baksa kamrangko ka∙anggen ine ua u∙iataha. Mikka kimprete a∙sel ong∙anio sianggipa manderangnaba sorkarini gita tangka paisarangko on∙e gampilskaanirangko dakanggen ineba agandapaha.
