Mande aro buringni mongmarang baksa chagronge a∙sel ong∙anirang bang∙bata somoion wal andalani bako ong∙rongbatanina Garo hills ni adita songrango solar light ko songe on∙angaha. Adita salrangna skang sam bol aro matburingrangni namgnina kam ka∙enggipa, Aaranyak dolrang, mande aro mongmarangni a∙sel ong∙ronggipa songrangko sandie ma∙sie ra∙angahachim.
Aaranyak dolrang, Borogobal, Photamati, Kharsengdap, Bondukmali, Darengsigre, Bordubi aro Jamdangre songrango a∙sel ong∙ronga bata ine u∙ienba dam 10 solar light rangko ia biaprango songdoe on∙angaha. Aaranyak ni Scientist, Dr Bibhuti Prasad Lahkar ni aganani gitade solar light rangara andalgipa biaprango jatenganiko on∙enba rama basee a∙sel ong∙aoni naljoksona dakchakbeani ong∙gen ine aganangaha.
Village Champion dolni manderangba solar light rangko songna Aaranyak na dakchakaniko on∙paaha ine uamangni dolni official, Anjan Baruah aganangaha. Ia light rangko Aaranyak dolni ning∙o donggipa Darwin Initiative support, Meghalaya Forest Department aro British Asian Trust baksa bakrime songe on∙anangaha.
