Batanggimin salo ma∙mong sorkarini UCC ko ra∙gatna am∙aniko bang∙a Northeast a∙dokni BJP baksa bakrime sorkari rikenggipa NDA alliance rang ia bill ni kosako uamangni ra∙chakna man∙gijaniko parakangtokaha. Conrad Sangma ni jegalata bakan gipin a∙dokrangba UCC ko jegalanina chakpaaniko on∙atokaha.
Nagaland a∙doko BJP baksa bakrimenggipa, Nationalist Democratic Progressive Party (NDPP), ia bill ko ra∙gatgenchim ong∙ode a∙doko atchikapgipa manderangni jakgitelaniko aro uamangna bil on∙gimin niamrangni kosako ong∙gija sinjetaniko on∙gen ine aganangaha.
Apsandaken Mizoram a∙dokni NDA chi dilenggipa sorkari UCC ni kosako official lekkarangko on∙e jegalaniko dakmanaha. Parliament ia bill ko ra∙gatgenchim ong∙oba, uamangni a∙dokni assembly ra∙chakja ong∙ode UCC ko a∙doko ra∙gatani dongjawa ine resolution o janapangaha. Assam a∙doko NEDA, Chief Minister H. Biswas Sarma chi re∙dilenggipa, uamangni vote bank rangna chanchienba chakpaaniko on∙a sikgijaniko mesokangaha.
Tripura ni Tribal party, Tipra Motha Party, Pradyot Kishore Manikya Debbarma ni dolba ia bill na jegalaniko on∙panaba donga ine knasamsoanirang gnang. Uamangni Autonomous District Council o re∙dilenggipa Tribal party, BJP dol baksa golpogrikanirang donggenchimoba uamang baksa bakrimaniko on∙a dongjaha. Salgro salaram a∙dokrango UCC ko ra∙gatanio Arunachal Pradesh a∙doknasan altuae ia bill ko ra∙chakna gita ammani ong∙naba donga.
