Re∙anggipa June 29 tariko Meghalaya Awaken Council Citizens (MACC) dolni dilgipa Banshai Marbaniang ni Marten jabol galdam-o gitcham samrangko galani bidingo sing∙doanina Health Minister, Ampareen Lyngdoh agantalate on∙angaha. Uni aganani gitade Directorate of Health Services (DHS) sing∙sandianiko dakenba je samrangkon jabol galdamona ra∙ange galegipa gimikan nosto ong∙giminrangsa ong∙a ine u∙ina man∙skaaha. Ia samrangko donchakramo biap cha∙e gapkete dongani a∙selo gital sokbagipa samrangko donna biap dongjani giminsa galena nangaona sokaha ine ua parakataha.
Ia samrangko Central Medical Store o nangchongmotgipa somoirangna jakkalna dongipasa ong∙achim. Covid-19 ni a∙selo ia samrangko chu∙ongagita jakkalna man∙jae dandake dona nangaiaha ine Lyngdoh u∙iataha. Central Medical Store o kam ka∙enggiparangni DHS na chitti see nosto ong∙gipa samrangko rang∙san galna nanggenok ine u∙iata bakan re∙anggipa jani 29 tariko jabol galdamona ra∙ange galeskaaha.
