Meghalaya a∙doko Goods & Service Tax (GST) kajina ra∙anio 27% tang∙doa

Meghalaya a∙doko Good & Service Tax( GST) kajina ra∙aniko see rakkiani gitade re∙anggipa bilsini June 2022 jana bate June 2023 jao 27% na baridapaha. Finance Ministryni see rakkigiminoniko parakatani gitade ia bilsini June jao a∙dok sorkari, gong 194.14 crore tangkarangko GST kajina gamanioniko man∙aha indiba re∙anggipa bilsi ni June jao man∙aniara gong 152.59 crore mangkosan man∙aiaha ine u∙ina man∙aha.

Ia bilsini June jao a∙song gimiko GST kajina chimonge gong 1,61,497 crore man∙aha. Chimonggimin kajinarangoni gong 31,013 crore CGST, gong 38,292 crore SGST, gong 80,292 crore IGST aro cess tax (sanna-banna ni na jakkalgipa bosturangna ra∙gipa) gong 11,900 crore ko man∙aha. A∙song gimiko chu∙gimik kajina game man∙anirangko re∙anggipa bilsi baksa nigrike niatgenchimode 12% mangna baridapaha ine u∙ina mana∙ha.