A∙dok sorkarini Youth Engagement Through Empowered Youth Organisation (Yess) Meghalaya Flagship Programmeko a∙bachengatani bilsisa gapaniko a∙doko katchabee manianga. Yess Meghalaya flagship Programmeni miksonganiara a∙dokni chadamberangko dingtang dingtang gadango tang∙dodapatna tangka paisachi dakchaniko on∙gipa mingsa Programme ong∙a.
Ia programmeko re∙anggipa 2022 bilsini July jao a∙doko ra∙gatangaha. Ia programmeni gita dakchakaniko man∙e a∙dokni chadambe dolrangna dingtang dingtang kal∙susaani aro daka-rikani bakrango adita tang∙dodapaniko nikna man∙aha ine a∙dokni skotong Minister Conrad K Sangma aganangaha. A∙dok sorkari ia programme na re∙anggipa bilsio gong 4.5 crore tangkarangko ge 1300 chadambe dolrangna chamataha.
Unbaksana a∙dokni skotong Minister Conrad K Sangma, “My Hero Campaign” koba oprake on∙angaha aro Yess Meghalaya programme na gitalgipa niamrangko on∙angaha.
