A∙doko songdongenggipa sakantini neng∙nikanirangko u∙iatna mana gita Call centre facility ko jakkale Chief Minister Helpline ko a∙dok sorkari a∙bachengatna miksongenga ine parakataha. CM Helpline ba Citizen Connect project-o register ka∙e, a∙doko songdongenggipa sakantian an∙tangtangni chagrongenggipa a∙sel ba neng∙nikanirangko sorkarina u∙iatna aro uko namdapatanina kamko ka∙na ra∙bana dakchakani ong∙gen.
Call centre ni gita dingtangmancha manderang ni neng∙nikanirangko sokatani, uko am∙sandiani aro kakket bichalko on∙ani rangko bak dake kam ka∙anggen. Neng∙nikanirangna namatani cholrangko am∙sandie kamrangko ka∙china nangchapgipa department rangna kamrangko suale on∙aniko dakangan baksa manderangni agandape on∙anirangkoba segate ba rakkie donanirangko dakanggen.
Helpline ona call ka∙na on∙enggipa gadangrangara namnikgijako parakani, u∙iataniko on∙ani, agandape on∙anirang, nangdapanirangko u∙iatani, dakchakani aro rang∙gitik nanganirangko on∙ani ong∙a. Chief Minister Helpline ko IT Firm jako ra∙e kam ka∙china a∙dok sorkari janapanirangko dakmanaha ine u∙iataha.
A∙dokni manderang sorkarini nangchongmotgipa kamrangko ka∙aniosan ong∙aija indiba an∙tangtangni neng∙nikanirangko dal∙batgipa dilgiparangna sokatanioba ja∙manchakanirangko chagrongna nangenga ni gimin ia call centreko a∙bachengatna miksongenga ine parakataha.
Songdongenggipa sakantini neng∙nikanirangko knachakna gita, gelna man∙gijagipa a∙songni chuttirangna agre konta kolgrikbrina ia call centre ko bilsi gimikan oprake on∙aigen aro iano an∙tangtangni neng∙nikanirangko call kae u∙iatna man∙gen ineba aganaha.
