Gitchambegipa Chibragre dollongko manderangni salanti re∙ruraanio kenchakani ong∙enga ine Babadam jolni Garo Hills State Movement Committee (GSMC), WGH ni Deputy Commissioner na, ia dollongko RCC rike on∙pachina lekkarangko on∙e mol∙molangaha. GSMC ni aganani gitade ia silni dollong da∙o chirang ditdoani a∙selo be∙gropani cholrang bang∙bea ine janapangaha. RCC dollongko rikanichi salanti uko jakkalenggiparangna naljokani ong∙gen ineba uamang parakangaha.
Ge∙gipin ramarang dongjae songni manderang ia dollongko salanti jakkalna nangao ga∙aka ine GSMC dol u∙iatangaha. Skul, College, Office re∙giparangna aro dingtang dingtang nanganirangna ia dollong gamchatbegipa ong∙a ine uamangni aganakoba knana gita man∙aha. Manderangni naljokanina ia gitcham dollongko RCC rikna nangchongmota ine DC na uamang dorgastoko on∙angaha.
