A∙dokni skotong Minister Conrad Sangma da∙al salni bako Union Education Minister Dharmendra Pradhan baksa a∙doko skie ra∙ani biap-o dingtang dingtang neng∙nikanirangni bidingo chanchirimaniko dakangaha. Meghalaya a∙doko chu∙onga gita skie ra∙ani biaprang dongkujani a∙selo training ko man∙kugijagipa skigiparang bang∙en dongkuengani gimin a∙doko College of Teacher Education (CTE) ko a∙bachengatna ma∙mong sorkario jakko on∙e kam ka∙pachina Union Minister-o mol∙molangaha.
A∙dok sorkarini mangsongenggipa, training man∙kugijagipa skigiparangna IGNOU ni ning∙o Secondary aro Higher Secondary-o skienggiparangna unbaksana elementary-o NIOS ni ning∙o training programme-ko on∙a manchianiko nirokatchina Union Education Minister ko didiangaha. A∙dok sorkari ni New Education Policy (NEP) ko a∙doko ra∙gatna miksonganina, skulrango rika cho∙anirangko nambatatna ma∙mong sorkari nirok-sandianiko dakangaha. Unbaksana SSA na tangka paisarangko chamagita ia NEP 2020 ni miksonganiko a∙bachengatanioba chu∙ongagita dakchakchina ma∙mong sorkario mol∙molangaha.
North Eastern Hill University (NEHU)-o Pro Vice-Chancellor, Registrar, Finance Officer, University Engineer aro ge 200 mangna bate bangbang ong∙e dongenggipa teaching aro non-teaching biap rango manderangko rimnapchinaba ma∙mong sorkariko didiataha.
Re∙anggipa Common University Entrance Test (CUET) porikkako a∙dokni a∙palo sena nangao ga∙ake senagita man∙rikjahachim uamangna dingtangmancha porikkarangko ong∙atchina Ministry of Education aro National Testing Agency (NTA) ko nirokatchinaba Union Education Minister o mol∙molangaha. CUET centre ko a∙dokni dam 12 a∙jarangon a∙bachengatna ma∙mong sorkario mol∙molangaha aro Shillong, Tura, Jowai, Nongstoin, William Nagar a∙jarango CUET centre rangko ta∙rake kamrangko ka∙china ma∙mong sorkariko didiataha.
