Bakrimgimin Garo hills a∙jani skigipa dolrang, All Garo Hills SSA School Teachers’ Association (AGHSSASTA), uamangni ja gittamni dormaharangko on∙china a∙dok sorkario dabiangaha. Skigiparang dormaharangko man∙kujae neng∙nikanina Chief Minister Conrad Sangma aro Education Minister Rakkam A. Sangma o mol∙molaniko dakenga ine dolni President LG Momin aganangaha. Ia on∙kugija donenggipa dormaharangara April jaoni June jaona ong∙achim.
Dormaha gri dongenggipa skigiparang salantio nanganirangna neng∙nikanikosan man∙aigija uamangni dedrangni skul aro college ni nanganirangnaba chu∙sokatna man∙jaenga ine janapangaha. Ja∙dokni porikkana skulni fees rangko gamsokjani a∙selo bi∙sarangko porikkao asongna beng∙anirangko chagrongenga ineba parakangaha. Uamangni aganani gitade Quarterly ba jagittam prak o man∙gnikoba name on∙genok ine Deputy CM, Prestone Tynsong aganmanahachim ine u∙itangaha.
SSA skigiparangna nanggnirangko on∙a gong 1191.615 lakh tangkarangko June jaona chamataha ine uamangni kobor ra∙timgiparangna parakmanahaoba mamingkon dakujaenga ine suk ong∙gijaniko parakangaha.
