Dalu Barengapara bajar antio skatang jabolrangko galenganichi neng∙nikaniko man∙engani gimin AHAM dolni General Secretary, Dilsang M Sangma, Dalu-ni MLA Brening Sangma aro MDC Pramod Koch ko nirokatchina mol∙molata. Ia antio jabolrangko galanichi uno pale sime cha∙enggipa aro koros ka∙na re∙bagiparang chaktogijagipa bibarangko man∙enga ine ua janapataha. Jabolrangko galchakna aro uko so∙e galna biaprang dongjae antidamosa dandake dona nangao ga∙akenga ine ua u∙iataha.
Skatang jabol galaniko dontongatchina aro jabolrangko galnagita dingtang biapko sandie on∙china, Sangma, MLA aro MDC ko didianga.
Dalu antio pale sime cha∙enggiparangna namdapa cholrangko bikote on∙a aro uamangna nambata biaprangko tarie on∙chinaba Sangma didiangjolaha. Sangma uni agananio pilak antiko jakkalenggipa manderangkoba jabolrangko skatang galpajachina mol∙molaniko on∙angaha.
