A∙dokni Sports and Youth Affairs Minister, Shakliar Warjri Meghalaya Games 2023 ko Turao ong∙atna miksonge biaprangko re∙bae nirokeaha. Ia kal∙susaanina tarisamsoanirangkoba dakengaha aro somoina skangan kamrangko matchotatgen ine ua aganangaha. Kal∙susaani gadangrangko namdapatna, dingtang dingtang a∙jani aro block ni gita kam ka∙e kal∙chakram biaprangko a∙dok gimikon tarie on∙na sorkari kam ka∙enga.
2025 bilsio National Games ko a∙doko ong∙atna man∙genchimode, a∙song gimikni kal∙susaaniko soka chakna man∙agita a∙dok sorkari daitoko ra∙na nanggen. Unbaksana pilak tarisamsoanirangko 2024 December jani gisepon matchotatna rakbee kamko ka∙anggen ineba Warjri u∙iataniko on∙angjolaha.
