Meghalaya a∙doko bijoli bikotna gita hydro project rangosan pangchake bijoli watanio neng∙nikaniko man∙enganina sorkari bijoliko bikotna dingtang cholrangko sandianggen ine Chief Minister Conrad Sangma aganangaha. A∙doko mikka bitchirangni komianichi gamchatgipa chibimarang aro dam-rang chonangani a∙selo pilakni gitan neng∙nikaniko man∙enga ine ua agandapangaha.
Hydro project-na agre bijoli bikotani adita a∙barang dongosa mikkangchina bijoliko man∙kamaigipa minggipin cholrangko dakangna man∙gen ine Sangma aganangaha. Iako dakna neng∙begipa kam ong∙genchimoba sorkari bijoli wataniko namdapatna ja∙kurangko de∙na nanggen ine ua agandapangaha.
Chief Minister-ni aganani gitade a∙doko bijoliko bilsi prako jakkalna nanganiara 1700 million unit mang ong∙a jeon Meghalaya a∙dok 1000 ba 1100 unit rangkosan bikotna man∙skaenga. Ian 600-700 mangni gita dingtanggrikani ong∙enga ine Sangma parakangaha. Ia chu∙onggijaniko central agency-rangni sualataniko man∙enga jean minggipin cholde a∙palchiko brena nanganian ong∙aiaha ine Sangma u∙iataha.
