Batanggimin 2014 bilsio koela bikotaniko NGT ni rang∙san dontongatani a∙sel re∙anggipa bilsi 10 na manderangni janggi tanganio neng∙nikaniko man∙aha ine Chief Minister Conrad Sangma aganangaha. NGT an∙tangtangni nikanio namgipa ja∙kuko de∙e dakaha indiba iako dakanichi mai dingtangatani aro neng∙nikanirangko ra∙bagen uko name nipilatjaha.
Bilsi 200 mangna manderangni dake cha∙anirangko NGT-ni rang∙san dontongataniara uamangni janggi tanganio neng∙nikaniko ra∙baaha ine Sangma aganchakangaha. NGT niam gri koela choanirangko a∙bachengo mitamko dontongate, bilsi bongani somoio gital technology rangko jakkalangani ja∙manosa, niam gri koela bikotanirangko chu∙gimik neng∙takatsrange kam rangko ka∙na nangachim ine Sangma aganangaha.
Manderang ru∙uta bilsirangna koela bikote cha∙giparang ong∙ani gimin, NGT ni rang∙san neng∙takatgenchimoba uamang dingtang cholrang dongjae apsan kamkon ka∙e cha∙aona sokangpilaia ine agandapangaha. Niamko ja∙rike koelako bikotani bidingo dingtang dingtang nanganirangna kamko ka∙engaha aro ru∙utgijan kamrangko a∙bachengataniko dakanggen ineba Sangma aganangaha.
