Nongalbibra dollong-oni Darang Boldakona tarigipa Contractor ni kosako FKJGP dol, a∙jani DC na badi ka∙a

Nongalbibra jolni Federation of Khasi Jaintia and Garo People (FKJGP) dol PMGSY rama tarienggipa contractor-ni kosako, ramarangko name tarie on∙jani bidingo matnangataha.

FKJGP dolni South Garo Hills-ni Deputy Commissioner (DC)-na chitti-o janapatani gitade Nongalbibra dolong-oni Darang Boldak-ona dakanggipa 10.78 km ramako tarina tangka gong 23 crore mangna ma∙mong sorkarioni chamataha. Ia ramarangko 2020 bilsini January jao a∙bachengate 2022 bilsini January jao matchotahachim indiba ia tarimangimin ramarang bilsi sani gisepon nosto ong∙anirangko nikna man∙aha ine parakataha.

Salantio ia ramako re∙ruraenggipa songni manderang ramarang nosto ong∙ani a∙selo, gipin biaprangona songre-songgabatenggiparangna namen neng∙nikaniko on∙enga ine ua jolni FKJGP dol a∙jani DC ko, ia ramako tarienggipa contractor-ni kosako niroke bichalrangko ka∙china chitti-o mol∙molataha.