A∙doko bijoliko watanirang 50% mangni gita komienga ine sorkarini agananina, Meghalaya High Court uamangni ra∙chakna amgijaniko parakangaha.
A·doko konta 12-na batpile bijoliko den∙anina saksa social activist, Flaming B Marak-ni May jao PIL on·gipani bidingo High Court chanchirimaniko dakangskaaha. Court-ni aganani gitade a∙doko bijoli den∙aniara mikka bitchi komiani a∙selo ong∙na man∙a aro komigenchimoba 10 per cent nigitasan salantio ong∙aigenchim. A∙doko bijoli komianira 50 ba 60% ong∙skaenga aro iachi salantio manderangna neng∙nikbeani ong∙enga ine court janapangaha.
July jani 5 tariko sorkarini report-o janapani gitade a∙doko salanti bijoli jakkalna nanganiara 200 MW ong∙achim jeon da∙o 88 MW kosan salantio bikotskaenga. Chu∙ongagita bijoliko bikotna man∙jani a∙selo bijoliko den∙a nangao ga∙akenga ine sorkari aganchakaniko on∙angskaaha.
Sorkarini aganchakaniko chu∙ongnikjae, rongtalbate district ge∙prakni reportko court-na pakwatchina sorkariko didiangaha. Mikkangchini namgnina chonchongipa bijoli bikotchakram aro minggipin cholrangchi bijoli bikotaniko sorkari a∙bachengatna nanga ine court ku∙pattianiko on∙angaha. Meghalaya a∙dok mikka bitchi man∙gipa ong∙ani gimin iako dakanichi bijoli watanio neng∙nikaniko songantina namdapatna man∙gen ine court parakangaha. Iako dakna komibegipa bilsi 10 ba 20 na niksamsoe chanchisamsona nanga ineba agandapangaha.
