Ma∙mong sorkarini UCC ko ra∙gatna am∙enganina a∙doko so∙sojengjeng ong∙engani gisepo Sixth Schedule na namgijani ong∙naba gnang ine manderangni chanchichipe kensoanina, UCC ko ra∙gatanichi tribal jatrangna maming namgijaniko ra∙bajawa ine BJP ni Vice-President aro Turani MDC Bernard N. Marak aganangaha.
UCC ara general-o ga∙akgipa biaprangnasan aro tribal biaprangna maming neng∙nikani dongjawa. General ine aganengon, je biaprango general niamrangchi sason ka∙aniko daka, ua biaprangosan UCC ko ja∙rikna gita nangaigen. UCC ko a∙songo ra∙gatgenchimoba tribal biaprangko dingtangmancha naljoke rakkina Constitution-o niam gnang aro maming kenchakani dongjawa ine Marak Budbar salo aganangaha.
Ru∙uta somoirangna galchipe donenggipa Northeast a∙dokrangko ra∙dona miksongesa BJP kamko ka∙enga aro tribal biaprangni nitobegipa daka-rikani aro bewalrangko gimaatna miksonge chadrapenga ong∙ja ineba Marak agandapangaha.
