Bristibal salo, Home Affairs ni bidingo Parliamentary standing committee-ni damsan tom∙e chanchirimanio Manipur a∙doko so∙sojengjeng ong∙enganiko chanchirimna jechakani ja∙man mikkangchakgipa MP dolrang ong∙kate kataha. TMC dolni Derek O’Brien, Congress dolni Digvijaya Singh aro Pradip Bhattacharya, Manipur a∙doko ong∙enggipa obostako committee nikchanggalenga ine chittio janape panel-ni Chairman Brijlal-na on∙mahachim. Committee-ni Manipur-o ong∙enga obostani gimin golpona jegalanina uamang namnikjae ong∙kate katskaaha.
Uamangni aganani gitade batanggimin jaoba Chairman Brijlal-na chittiko on∙manahachim aro ua an∙tangba July jao Manipur a∙dokni bidingo golporimgen ine ku∙wataba dongahachim. Committee ni member aro a∙songni dilgipa ong∙e ia a∙selrangni bidingo golpona jechakaniko chinga ra∙chakna man∙jawa ine uamang agandapangaha. Koborko man∙soani gitade re∙baenggipa tom∙bimonganio uamang bak ra∙angjawa ine parakataha.
