2021-22 bilsina, Ministry of Education, Performance Grading Index (PGI) o pangchake skia-porani bidingo tosusaanio Meghalaya nambatgijagipa a∙dokrangoni ge∙sa ong∙e bon∙kamgipa gadangona donatako man∙aha. PGI-ni gita tosusaani chu∙gimik 10 grade mang gnang. Skanggipao 90% na batgipa Daksh, Utkarsh (81% – 90%), Ati Uttam (71% – 80%), Uttam (61% – 70%), Prachesta-1 (51% – 60%), Prachesta-2 (41% -50%) aro bon∙kamgipao Akanshi-3 grade jekon 10% ba una bate man∙gipao napatskaa. Meghalaya a∙dok 420.6 mangni score-ko man∙e Akanshi-3 grade o bon∙kamgipa gadangona tang∙onangaha.
Northeast a∙dokrangoni Mizoram a∙dokba 453.4 aro Arunachal Pradesh 458.5 ko man∙e Akanshi-3 grade o napatako man∙giparang ong∙paaha. India a∙song gimiko Chandigarh ge∙sa Union Territory ong∙e Punjab a∙dok baksa 641-700 score rangko man∙enba Prachesta-2 o napatako man∙aha. Indake uamang a∙songo skia-porani bidingo nambatgipa ong∙e chu∙batgipa gadangona sokdoangaha.
Meghalaya a∙dok batanggimin adita bilsirango skia-poraiani bidingo name dakna man∙jani a∙selo a∙song gimiko bon∙kamgipa gadangko man∙angaha.
