South West Garo Hills a∙jani Ampati-o skanggipa changna Meghalaya Early Childhood Development Mission (ECDM) ni tom∙bimonganiko, atchidaldal bi∙sarangni siaoniko champengna aro atchidaldaloni bilsi chet ona ong∙gipa bi∙sarangni an∙seng baljokaniko ra∙bana department ni manderang ku∙mong nangrime kam ka∙angna mangsonge ong∙atangaha.
Ia tom∙bimonganiko a∙jani Deputy Commissioner Raksin P Marak aro Betasing C&RD Block ni BDO Crystal R N Sangma, ECDM ni dolrang, resource person rang aro dingtang dingtang department ni changgipa sapgipa skigiparang aro agency-rang nangrime ong∙atangaha. Asian Development Bank (ADB) ni gita ECD Mission na a∙dokni dam 15 dingtangdingtang block rangna tangka paisa rangko chamataha.
Battanggimin ja dokni gisepo sak 6 atchidaldal bi∙sarang siaha, indiba ma∙giparangni siani ko da∙o dipet knaa dongkujagenchimoba ian simsaksona aro chanchina nangsogipa kam ong∙enga ine DC aganangaha.
Ia tom∙bimonganio Betasing Block ni dam 32 songrangoni sak 200 mangna batpile manderang re∙baaha.
Unbaksana songni headman, VHC, VEC, ASHA, Anganwadi o kam ka∙giparang, SHG aro VO ia tom∙anio bak ra∙e an∙tangtangni u∙i-ma∙sianiko aro nangbatgipa kam rangni gimin aganchanchirimaniko dakanagaha. MSRLS, NHM, ICDS, SRES ni skigiparang songsulo bi∙sarangko maikai name simsake dal∙atna nanganiko agangrikani aro daka rikanikoba skie on∙angaha.
