Rongrong constituency-ni MDC Rinaldo K. Sangma re∙baenggipa GHADC-ni session o somoi rangko bakrokalatna nanga ine GHADC Chairman na chitti sedoate mol∙molaniko dakangaha. Bang∙bata changon salgni ni session-o konta prakni somoiko salprako suale on∙aniara chu∙ongmanchaja ine aganan baksa ia re∙baenggipa session ko komibeoba antisana jekon July 25 oni July 29 tarikona ong∙atna nanga ine ua janapangaha.
Somoirang apchangketani a∙sel re∙anggimin session-rango uamang nanggipa sing∙ani aro aganchakanirangko name dake chanchirimna man∙rongja ine Sangma aganangaha. Jat ni nangchongmotgipa daka rikani bidingo chanchirimna, sakanti dilgiparangna aganchakna aro chanchirimna somoi chu∙ongagita on∙a nangachim ineba ua agandapangaha. Ia kattarango pangchake ua GHADC ni Chairman-ko ia mamlani bidingo nirokatpachina mol∙molangaha.
