Robibar attamo, Institute of Science and Bio Resource (ISBR) o kam ka∙gipa sakgittam manderangni manggisiko uamangni dongchakgipa nok building Umsawli, New Shillong-oniko, chaktogija sengani bibarangko man∙ani ja∙mano am∙sandie nie gittimni Sordar nikaha.
Manggisirangko nikani bakan Mawdiangdiang Police Station-ona ui∙ataniko dakaha. Sianggipa manderang, Mawlai Phudmawri-oni Sheba Kharbani (40) jean cleanerni kamko ka∙engachim, Rupert Donbor Dohtdong (43) aro Backstar Kharkrang (30) ong∙a ine pulisrang parakataha.
Pulisrang sing∙sandianiko dakon sianggiparangoni sakgni manderang Bristibar salo sepangjolo donggipa buringoniko me∙gimu am∙na re∙angaha ine u∙ina man∙aha. Unbaksana uamangni dongchakenggipa nok ni kutturi ge∙saoniko song∙gimin me∙gimurangkoba man∙aha. Pulis dolrang, uamangko bisi gnanggipa me∙gimuko cha∙ani a∙selosa sina nanga ine chanchichipe aganangaha.
Uamangni manggisiko namedake talbate ma∙sina gita porikka ra∙e nina NEIGRIHMS ona watatskaaha ine parakataha.
