South Garo Hills, Baghmara songjinmani Wagesik aro Malikona songo antisana batpile bijoli gri dongengani gimin manderang ding∙chaoni ong∙katenga ine koborko man∙soaha. Uamangni aganani gitade ia songrango transformer namgijako ru∙utbea salonin tarichipgija galchipe donengani a∙selo bijoli gri ong∙anichi neng∙nikanirangko man∙enga ine u∙ina man∙soaha. Uamangni neng∙nikaniko department tarake niatgija donaiode songni manderang consumer court ona re∙ange badi ka∙aniko dakangna parakangaha.
Ia song damgnini manderang ong∙enggipa obostani bidingo SGH a∙jani Deputy Commissioner-na re∙ange u∙iatahaomangba maming namgnikon man∙jaha ine parakangaha. Uandake MeECL department transformer ko tarie on∙a skang uamangni gamna nangenggipa bill-rangko gamchengnasa aganangaha. Malikona songni manderangni aganani gitade MeECL uamangoniko gong 17.8 lakh gamna agangipaoni gong 4 lakh kode gamanaha ine parakangaha.
Gamjringe jakkalenggipa nokdangrangna bijoliko name watchina song damgnini manderang melie dabiangaha. Gamgija jakkalenggiparangko bill-rang tang∙dona skang somoigita u∙iate gamna agana nanga ineba uamang parakangaha.
