Robibar salni 11 baji mangni somoio, WGH a∙jani Purakhasia, Chengrapara songo bijoli nanga man∙e segipa siaha aro an∙o jachet dongenggipa jikgipa bilongbee saknaaniko man∙aha. Songni manderang ia ong∙a obostana Dalu Civil Sub-Division-ni ning∙ao bijoli watenggipa SAI Private company-ni simsakgijani a∙sel ong∙aha ine matnanganiko on∙angaha.
Uamangni attamo re∙ange nieaniko dakon silbudu dinggnini nangdime donganiko nikeaha ine u∙iataha. Ia company bang∙a Garo Hills ni songrangona bijoliko watna daitoko ra∙mangipaba ong∙a. Uamangni simsakgijanichi da∙o mandeni janggi gimaaha ine songni manderang company ni kosako dosi galangaha.
Sianggipa Bryan Donseng Marak (30) aro jimbee saknaako man∙gipa uni jikgipa Epsil N Marak ong∙a. Jikgipako da∙o Tura Civil hospital o donne sanna bannaniko dakangskaenga jeon obostarang namkaljaenga ine parakataha. Ia ong∙a obosta uamangni mobile phone-rangko charge ka∙miting somoio ong∙aha ine koborko man∙soaha. Ua apsan somoion mikka kimprete uamangni dangtapenggipa phone-rango bijoli re∙gope sakgnikon nangaha ine u∙iataha.
