Re∙anggipa July 4 tariko Chief Minister Conrad Sangma aro Education Minister, Delhi-ona re∙ange Union Minister Dharmendra Pradhan ko gronge a∙doko Education department-ni neng∙nikanirangko u∙iatangaha. Union Minister uamangni neng∙nikanirangko janapaniko man∙e ma∙mong sorkarini chu∙batgipa gadangni official-rangko Education department-ni neng∙nikaniko nambate ma∙sie ra∙na a∙dokona watatenga ine Rakkam Sangma aganangaha.
Education Department ni nangchongmotgipa kamrangna aro neng∙nikanirangko nipilna Shillong songjinmao ma∙mong sorkarini official-rang baksa tom∙bimonge chanchirimanggen ine Sangma parakangaha. Union Minister ni ia namgipa kamna Sangma mittelpilaniko on∙enba a∙doko neng∙nikanirangko chanchirimna tom∙bimonganiko July 20 ba Assembly session na skang dakanggen ine ua aganangaha. CUET ni bidingo kobor ra∙timgiparangni sing∙aniko dakon porikka sechakram ba centre rangko Shillong, Tura aro Jowai-o songe on∙anggen ine Sangma parakangaha.
