Mijal salni bako East Garo Hills a·jao donggipa Rongding chiringko kabatgipa RCC dolongko PHE Minister, Marcuise N Marak aro DRDA-ni Project Director, A G Momin oprake on·angaha. Ia dolongko MGNREGA scheme-ni gita gong 94 lakh-na bate chamatgimin tangka paisarangchi bilsi gni mangni somoio tarie matchotataha. Rongbinggre-A aro Rongbing Boldak VEC rangni nangrime kam ka·anichi ia dollongko chu∙sokatna gita man·aha.
Ia dolongko man·anichi bang∙a songrangoni L.P aro U.P skulrango re·enggipa bi∙sarangna namen dakchakaniko ra∙bagen ine aganangaha. Unbaksana chiring nalsachi donggipa Sub-Centre-o kam ka·enggipa manderangnaba nengrae gari gora sale re∙rurana gita man·genok aro songrango na∙tok jile cha∙giparangnaba dam-ko tarianichi namgni ong·gen ineba parakangaha.
