WGH, Tura Dakopgre-o, Health Centre ba sanchakram nokko kragija bewalo kam ka∙e rikenganiko niatpachina social activist Cherian Momin, Chief Minister Conrad Sangma na chitti see mol∙molataha.
Ia rikenggipa sanchakram nokko adita salrangna skang WGH a∙jani DC aro New Tura Development Forum (NTDF) dolrang re∙ange nirokaniko dakeon namgija bewalo rikaniko nikeaha. Indake kragija bewalo sanchakram nokko rikaniara sanna bannaniko dakna re∙bagipa manderangna kenbeani ong∙a aro maming naljokatani dongja ine Momin aganangaha.
Changgipa sapgipa aro bil donggiparangko sanchakram biapona watate rika cho∙anirangko nirok sandie ru∙utgijani gisepo name taridape on∙a nanga ine Momin janapangaha. Ia sanchakram nokko rikenggipa contractor-ni kosakoba uni kragija bewalo namgija kam ka∙anina am∙sandianiko dake raka sastiko on∙angna nanga. Iako dakanichi mikkangchi rika cho∙ani kamrangko nambate ka∙na dakchakani ong∙gen ine Momin agandapaha. Rika cho∙aniko niamgita ja∙rike rikna nirokaniko dakrongna nanga aro salanti nirokanichisa namgipa bosturangko jakkale kamko ka∙e matchotna amgen ine Momin parakangaha.
