Dalu Chenggapara jolo bijoli nange sigipani palo on∙pilskaaniko dakchina WGH a∙jani DC o mol∙mola

Re∙anggipa July 9 tariko, Dalu Chenggapara songo bijoli nange a∙sel ong∙anio sianggipa nokdangni manderang West Garo Hills a∙jani Deputy Commissioner-na chitti seate janggi gimagipa mandeni nokdangna on∙pilskaaniko dakchina mol∙molangaha. Ia a∙sel ong∙anio Brian Donseng M. Sangma bijoli nange siangaha, unbaksa uni jikgipa Epsilla N. Marak bilongbee saknaako man∙e sanna bannaniko dakenba janggi joknagita man∙aha.

Sianggipa nokdangni manderang ia ong∙a obostako MeECL-ni simsakgijanichi janggiko gimaatna nangao ga∙akaha ine matnangskaaha. Apsan salon uamang Purakhasia pulis noko badi ka∙doanikobaa dakangjolaha. A∙sel ong∙ao sianggipani palo Bostone M. Sangma West Garo Hills a∙jani DC na janapate ta∙rake on∙pilskaaniko dakchina mol∙molaniko dakangaha.