Meghalaya a∙doko tourism-ko tang∙doatna sorkarini gita bilsi prako ge hajalsa homestay ba songregiparangna dongchakram nokrangko dakchakna Tourism Minister Paul Lyngdoh ku∙watangaha. Iako dakanichi a∙dokni chadamberangna an∙tangtangni changa sapanio aro bilo pangchake janggi tangna namgipa chol ong∙gen ine Lyngdoh janapangaha. Sorkari ge hajal bonga mang homestay rangko bilsi bongani gisepo dakchakna miksonganiko Lyngdoh parakangaha.
A∙dok sorkari ia programme-ni ning∙o Lakh 10 mangni gita ge∙prak homestay-na on∙a tik ka∙aha. Lakh 10 oni bak 70% kode chu∙gimik PMEGP-ni gita sorkari dakchake on∙gen aro bak 30% de Meghalaya Rural Bank (MRB) ni gita loan-ni ning∙ao napskagen. Ia loan-ko ra∙na maming dan ba gamjinko on∙kangna nangani gri man∙a gita amgen. Manderangni dorgasto galgiparangko MRB ra∙chake uamangni dakna nanga kamko ka∙enba, bangki kamrangko department ka∙skae tangkarangko dorgasto gal∙gipani account-ona watatskagen.
Tourism Minister pilak gisiko nanggipa a∙dokni manderangko ia namgipa cholko dake ra∙china didianiko on∙angaha.
