West Garo Hills a·jani Tura supermarket building baksa nangdime tarigimin nalaoni ramarangona moilarang selbaengani gimin ramako re∙ruraenggipa manderangna aro rama samo dokan dake cha∙giparang neng∙nikaniko man·enga ine parakataha.
Ia moilarang septic tank-oni selbaengani a·sel namen sengbegipa bibarang ramarango giproroenga. Ia chaktogijagipa bibarangni a·sel bree cha∙gipa manderang dokanrangona re∙baoba katpilangaona sokenga ine badinge cha∙giparang matnanga gnang aganataha.
Ia obosta salantian saljatchini 2:30 bajimangni somoio moila baksa chi selbaaniko nikronga. Jensalo PHE-ni chirangko waton ia nala ning∙o donggipa moilarangko sikpake gale ramarangona jokbaenga ine rim∙chipe badingchiwale cha∙gipa manderang aganangaha.
