Tura supermarket building baksa nangdime tarigimin nalaoni ramarangona moilarang selbae chaktogijagipa bibarangni a∙sel ramako re∙ruraenggipa manderangna aro rama samo dokan dake cha∙giparangna neng∙nikaniko man·enga ine saksa Social Activist Cherian Momin chitti see West Garo Hills a∙jani Deputy Commissioner-na janapataha.
Ia obosta moila gnanggipa nalarangoni selbaani a·sel ong∙enga jean rama samo dokan dake cha∙giparangna noksanko ra∙baenga. Bosturangko brena re∙bagipa manderang ia chaktogijagipa bibarangni a∙sel uamangni dokanrangona re∙angjaenga aro iachin uamangni pale sim∙e cha∙anio neng∙nikaniko man∙enga ine janapangaha. Ia moilarangni selani pangnan 2:30 bajimangni somoio ong∙ronga ineba parakataha. PHE-ni chirangko waton ia nala ning∙o donggipa pipe-rangni selani a∙sel moilarangko sikpake gale ramarangona jokatbaenga ine badinge cha∙gipa manderang u∙iataha.
Da∙o ong∙enggipa namgijagipa obostako manderangni an∙seng baljokanina aro uno dongkame badinggiparangni namgnina, jako ra∙e ta∙rake kamko ka∙na ja∙ku de∙china mol∙molangaha. Ia moilarangni selani ja∙pang ja∙dilko am∙sandie man∙a dipet ta∙rake nirokatchinaba Momin didiangaha.
Tura supermarket baksa nangdime tarigipa nalarangko name tale am∙sandianiko dakna nanga aro chi jokenggipa pipe rango nosto ong∙e selani cholrang donggenchim ong∙ode uko nina gita nanga. Supermarket-ni septic tank-ko ta∙rake taridapataniko dakna nanga aro mikkangchi nalarangoni moilarang seltaijachina gita kamko ka∙na nanga. Unbaksana jabolrangko simsake galna manderangko didiangna nanga ine Momin ku∙pattianirangkoba on∙angaha.
Indakgipa obostao ga∙akgipa biaprangko rongtal-an∙talatna aro an∙seng baljokaniko ra∙bapilna nangchongmota ine Momin agananga. Supermarket jolo dongenggipa manderang aro badinggiparang ia obostako ta∙rake nirokatgen ine DC-o mol∙molan baksa pangchake ka∙dongenga ineba ua aganangaha.
