Ma∙mong sorkarini a∙song gimiko UCC-ko ra∙gatna am∙enganina, Garo Baptist Convention (GBC) jegalataha. Ia niamko ra∙gatanichi A∙chik jatni dingtanggipa dakbewal rikbewalko gimaataniona ra∙bagen ine Budbar salo aganangaha. Ia niam ko nangnikgijaniko uamang Law Commission of India ni Member Secretary, Chief Minister Conrad Sangma aro National Churches Council of India naba parakatangaha.
GBC-ni janapani gitade, ia niamko a∙song gimiko ra∙gatgenchim ongode Assam aro Meghalaya a∙doko dongenggipa Achik jatrangni Christian toromko ja∙rike olakianiko bon∙atgen. Sixth Schedule-ni dongimin niamo pangchake je daka-rikaniko ja∙rikbaenggiparangkoba gimaataona sokatgen ineba janapangaha. Ia niamko ra∙gatahaon A∙songo mingsa niamkosan ja∙rikna nangani gimin Indiani dingtang dingtang a∙dokrango dongenggipa jatrangni dakbewal rikbewalba gimaani ong∙gen ine GBC agandapangaha.
Unbaksana A∙chikrangni dakbewal jekai, bia ka∙ani ja∙mano me∙asa me∙chikni nokona chawari re∙baani, dedrangrang ma∙ani chatchiko de∙ani aro me∙chik nokni gamjin ko man∙rikanirangko ja∙rikbaenggipa pilakan gimaani ong∙gen ineba janapangaha. Uni gimin pilak jatni dakbewal rikbewalko gimaatjana gita ia niamko ra∙gatjachina mol∙mole GBC aganangaha.
