South Goa-ni Majorda Salcete-o call centre-ko tol∙e chalaienggipa saksku manderangko Goa Crime Branch-ni pulisrang da∙al salni bako rim∙aha. Ua rim∙a cha∙gipa sakskuoni sak gittam manderangara Meghalayani Akash Biswa (26) Akash Sunar (23) aro Ajay Biswa (25) ong∙achim.
Koborko man∙soani gitade pulisrang ua biapona napdraenba sak sku manderangko rim∙aha. Unbaksana ge∙sku laptop baksa headphone, ge∙sku router, ge∙gni modem, ge∙sku mobile phone, cable aro gipin bosturang baksa gong 65,000 tangkarang jean chu∙gimik lakh 15 mangni gita ong∙gipako ua biaponiko man∙aha.
Rim∙a cha∙gipa manderang cha∙boke cha∙na gita tol∙e call centre ko chalaienba US-ni manderangni gimin chu∙gimik tale u∙inagita X-lite app-ko jakkalangaha. Laptop aro Virtual Private Network (VPN) rangko jakkalenba US bank-ni loan on∙gipa officialrang ine dakmike manderangko tol∙e cha∙bokangaha. Uamang manderangna loan-ni credit score komiahani gimin dai gamna nangengaha ine tol∙e cha∙boke tangkarangko ra∙aha ineba Goa police aganangaha.
