Batanggimin 2015 bilsini January jao Ri-Bhoi a∙jani Patharkhmah-o Sub-Inspector Pearlystone Joshua Marbaniang-ni siani bidingo uni ma∙gipa am∙sandianiko dakchina badi ka∙angaha. Uni badi ka∙ani ja∙man Special Investigating Team (SIT) am∙sandianiko dake bang∙a sorkarini ning∙o kam ka∙giparangni niamgri koela bikotanio, bol aro ro∙ongrangko salanirango jak donga ine parakataha. Ia u∙iataniko Marbaniang ma∙gipani badi ka∙anina High Court ni knaatani somoio u∙iataha.
SIT ni parakatani gita koela, bol aro ro∙ong-rangko niamgri watna gita gari bolprako damrangko tik ka∙anirangkoba mesokangaha. Unbaksana mitam bimingrang aro officialrangni jak donganikoba nikna man∙a ine High Court parakataha.
Ia rai on∙ani somoio dongpagipa Additional Advocate-General K Khan ko ia mamilani bidingo dilangchina court aganangaha. Ia mamilani am∙sandie man∙gipa reportrangko aro lekka pancharangko High Court-ni ning∙o donggipa officer rangni jako donchina ge∙etaniko HC on∙angaha. Ia lekkarangko ua office-o donggipa manderangna aro Khan na agre nirokaniko dakna man∙jawa ineba HC ge∙etangaha.
