Tura songjinmani ning∙o donggipa Kongbe A∙ding gittimo, bilsi 28 ong∙gipa me∙asa saksa an∙tangko kae siaha ine koborna parakataha. Sianggipa mandeni bimingko Sanches D. Sangma ine mingachim. July 7 tariko, ua mandeni nokoni gimaaniko ma∙drangoni Pringkame D. Sangma, Budbaro salo u∙iataniko dakahachim indiba uni gimaaniko pulis station-o mokordoma ka∙anirang dongja ine koborangko man∙soaha.
Pulisrang am∙sandianiko dakani ja∙mano uni dongchakenggipa nokoni meter 600 mang chel∙ao donggipa buringoniko sogimin manggisiko man∙aha ine u∙iataha. Uni siani chong∙mot a∙selko u∙ina gita manggisiko porikka ra∙e nina Tura Civil Hospitalona ra∙angaha ine kobor ra∙timgiparangna parakataha.
