Uniform Civil Code (UCC) ian mingsa pagitchamrangni chanchie bikote donanggimin niam bidik ong∙achim aro iako ra∙gatna Indian Constistution ni Part-IV Article 44-o segimin niamrang gnang. Indide UCC-ko ra∙gatanichi an∙chingni Northeast a∙doko songdongenggipa manderangna neng∙nikaniko ra∙bagenma? Ian NE a∙jao songdongenggipa manderangna dal∙bea sing∙ani aro jajrengani ong∙enga.
UCC bill-ko ra∙gatani chu∙gimik miksonganirangko da∙o dipetde Northeast ni manderangna talatani dongkuja. Northeast a∙dokrango songdong a∙chagiparangni dakarika bewalrangko ripingna UCC ko ra∙gatanio niteani donggenma? Niteani dongjagenchim ong∙ode ba manderangni dakarikarangko ripingna cholrangko done ra∙gatjaode NE ni manderang uamangni dakbewalrangko gimaatna nangao ga∙akgen.
Northeast a∙dokrango dongenggipa jat ge∙antini daka rika bewalrangko ripinganiko namen simsake rakkina nangenga. Northeast a∙jarangoni Meghalaya a∙dokko niatgenchim ong∙ode an∙chingni a∙dokni dakbewalara namen gipinrang baksa dingtanggrika. Ia dingtangbegipa dakbewalara me∙chikko nokni skotonggipa done, gam jinrangko man∙rikgipa aro ma∙gipachiko chatchi ma∙chong chane derakatanian ong∙a.
Meghalaya a∙doko songdongenggipa jatrangni dakbewalrangko aro bebe ra∙aniko naljokatna man∙a amesa ia bill-ko ra∙gatna gita nangenga. UCC bill-ko ra∙gatanichi dingtangatanirang donggenchim ong∙ode nipilna gita nangenga maina iarangko manderang ra∙chakna amchongmotjawa. UCC ko ra∙gatna skang India a∙songni dingtanganiko poraichengna nanga jeon NE a∙jaba ge∙sa daka-rika aro bewalrango namen dingtangbegipa ong∙paa.
Northeast a∙dokrango dongenggiparangni daka rika bewalrangko ma∙sie aro jatni mikkim rasongko ripingna mikkangchina name chanchie ma∙mong sorkari kam ka∙na nanga. A∙songni pilak gunrangko nigrikgija ja∙ku de∙ode bang∙bata NE a∙jarango sosojengjeng aro dakgrik dingrikanirang ong∙naba gnang. Uni gimin ia a∙sel ong∙gnirangoni naljokatna gita nama bewalosa je ja∙kurangko de∙oba sakantina chanchia gnang dakna nanga.
