Mijal salni bako Ukraine a·songni salaram aro salgipeng-salaram jolo bilongbee dakgrikani ong·angaha. Ia obostani a·selara Russian a·songni ra∙sekgimin a·arangko man·pilnagita ong·achim aro bang∙a bobil dolni sipairangko warachaksoaha ine Ukraine-ni sipai dolrang Mongolbar salo u∙iataha.
NATO baksa membership ong·na Ukraine a·songna chu·onggipa somairangko on·janina Ukraine-ni President, Volodymyr Zelenskiy ka∙onanganiko parakangaha.
Ukraine ni sipairang Bakhmut songjinmani salgro jolo donggipa damgni chongipa jillani sepango dal∙dalgipa aro bilakgipa silchidarerangko jakkale warachake, batanggimin May jao Russia-ni sipairangni ra∙sek man∙gipako dakgrike Russia ni sipairangko amataha ine Ukraine ni General Staff-ni ku∙watimgipa, Andriy Kovaliov parakataha.
Dakgrik dinggrikani pilak bakrango ong·an baksa Ukraine ni sipai dolrang chang 27-na bobil dolrangko warachaksoaha. Kanta 24 gisepon Russia ni sipairangrang ritchani ritcha siangaha aro mata buako man·aha ine Ukraine-ni General, Oleksander Tarnavskyi telegramo seachi u∙iataha.
Ia dakgrik dinggrikani sal 500 bate ong·ani ja∙mano, Ukraine-ni a·arangko 17 percent ni gita Russia-ni sipairang ra∙seknagita chu·sokaha ine parakataha.
