Chokpot-oni Sibbari-ona tarianggipa kilometre 20 mang ong∙gipa ramako da∙onaba matchukujaenga ine ua jolo songdongenggipa saksa Sengjan M. Sangma koborna parakataha. Ia ramako jakkalna dal∙dalgipa gari gorarangna saltogijani ong∙enga ineba ua janapangjolaha. Ia sorokko Mukul Sangma-ni Meghalaya United Alliance, sorkariko chalaimiting somoio 2017 bilsionin tarina a·bachengataha. Ramako taria tong∙sanigita mangba matchotkujaenga aro badia contractor jako ra∙e kam ka∙engachim iani giminba song-nokni manderang darangba ma∙sia dongja. Sorokko kam ka∙giparangkoba giseposan nikna gita man·aia ine Sangma matnange aganangaha.
Unbaksana Chokpot-ona dakanggipa ramarang, Tura-ona re∙ango Gasuapara aro baromile ramarang namjaenga ine u∙iataha. Baromile-Chokpot ramako samsako tarie matchotgenchim ong∙oba samgipinkode tarigija galchipe donaiaha. C&RD block rangoni a∙dok gimiko galchipbatsranggipa ong∙e ru∙uta somoirangna ia obostako chagrongna nangenga ine Sangma janapataha. Gasuapara jolkoba chasonggitam mangna galchipahani gimin ua biaprango donggipa manderang wachi kariode rama namjani a∙sel noktangoniko garirangko bikotna man∙rongja aro a∙rankariosa garirangko salna man∙ronga ine parakataha.
