GSU East Zone, Williamnagar dolrang Education Minister Rakkam Sangma na skul aro college ni nangnikanirangna memorandum ko July 13 tariko on∙angaha. Memorandum-o janapani gitade EGH a∙jani Rongrenggre Government Higher Secondary skul-o bilsi bongana kim∙kime kam ka∙gipa Principal dongjani gimin uko ra∙bae on∙china janapangaha. Ian songjinmao sorkarini ge∙sa kamkam skulba ong∙paa ine koboro parakataha.
Poraichakram class room-rangko chu∙onga gita tarie on∙china mol∙molatan baksana Science lab, Library, ki∙chak su∙buchakram nok aro chu∙onga gita jakkalani chirangko tarie on∙china janapangaha. Minggipin memorandum-ara Loyola College na skigiparangko rimnapaniko dakengon kragipa aro chu∙onga gita ma∙sigipa skigiparangko mikkang nianigri quota-o pangchake rimnapna man∙a gita nirokatchina Education Minister Rakkam Sangma-ko mol∙molangaha.
