Manipur a∙doko jatska baksa so∙sojengjeng ong∙anio bang∙a Christian gilja nokrangko so∙e aro nisiate galani bidingo jegalaniko daka gnang Mizoram BJP-ni Vice-President R Vanramchhuanga Bristibar salo an∙tangni kamko wataha.
Vanramchhuanga-ni kam watani miksonganiara Manipur-o Christianrangni kosako niamko pe∙e onia ka∙e ong∙gija dakaniko jegalaniko mesokani ong∙a ine uiataha. Batanggimin sal somoirango Manipur a∙doko so∙sojengjeng ong∙anio ge 357 gilja nokrang, pamongni Quarter-rang aro Office nokrangko so∙e galangaha. Manipur a∙dokni Chief Minister N Biren Singh iani bidingo agan-janapa dongja ine Vanramchhuanga uni chittio janapangaha. Una agreba Union Home Minister, Amit Shah Imphal-ona re∙anggenchim ong∙oba gilja nokrangko so∙ani bidingo dontongatna aganani maming janapanikoba dakjaha ine ua aganangaha. Apsan daken ma∙mong sorkariba Christianrangni gilja nok rangko nisiatani gimin maming janapanikoba dakjaha ineba Vanramchhuanga agandapangaha.
Mizoram-ni BJP Vice-President R Vanramchhuanga ia bilsini November jao ong∙nasienggipa Assembly election na skang kamko wataha. Mizoram a∙doko 87% mangna batpile Christian rang donga aro 2018 Assembly election-o BJP Mizoram a∙doko seat ge∙sako manahachim. Manipur a∙doko ong∙enggipa obostarangko nike ua mikkangchina chanchisamsoe BJP Vice-President kamoni ong∙kate kataha.
