West Garo Hills a∙jani Phulbari pulis dolrang Bangladesh a∙songona matma bi∙sarangko badingsrukna miksonge ra∙anggipa gari pick-up bol gittamko rim∙aha.
Bristibar salo Phulbari pulis dol kobor rangko manso∙e Phulbari AMPT ramao naka checkingko dakanio gari pick-up bol gittamko driver sakgittam baksana matma bi∙sa mang 18 ko rim∙na gita man∙aha. Ia matma bi∙sarangko Bangladesh-chi badingsrukatna gita Patharkata-oniko Hallidayganj-ona salangengachim ine West Garo Hills-ni SP V S Rathore parakataha.
Ia naka checkingko dakanio Bangladesh-chi badingsrukna ra∙anggipa matma bi∙sarangko chu∙gimik mang 50 ni gita man∙aha ineba pulis dol pararakataha.
