Tura songjinmako Winter Capital songna dabiani ru∙utbea somoionin ong∙a aro iani bidingo a∙dok gimiko pilakni gita tang∙doaniko nigrikesa kam ka∙na nanga ine Chief Minister Conrad Sangma aganangaha. Indakgipa dabianirang sokbaengon iarang pilakan a∙dokni dingtangani aro janggi tangani tang∙doanio pangchaka ine ua agandapangaha. Winter Capital-ko ra∙bae on∙anichi a∙doko kamrangko ka∙anio dingtanganiko ra∙bagen ine chanchianian manderangni ka∙dongsoani ong∙a ine Conrad Sangma jangapangaha.
A∙dokni pilak biaprangna kamrangko ka∙anio apsan tikatna sorkari jotton ka∙enga ine Sangma aganangaha. Mini Secretariat ko skanggipa changna Tura, Jowai aro Pynursla a∙jarango re∙baenggipa salrango songe on∙aba sorkari tik ka∙manaha ine Sangma parakangaha.
Ia Mini Secretariat ba Secretariat-ni kam ko ka∙nagita dingtang mancha pilak department rangko jako ra∙e kam ka∙angna a∙bachenganggen. Ia dal∙begipa dingtanganiko ra∙baaniara ka∙sine kam ka∙anichisa chu∙sokna amgen ine Sangma aganangaha. A∙dok aro a∙jako nirokanio rika cho∙ani kamrang mikkangchi sokbaenga aro iako dakna pilakko nigrike somoi ra∙esa ka∙na man∙gen ine Sangma parakangaha.
Je kamrangko ka∙na skangba sorkari pilakni gita a∙dok gimikko nigrikna nangchenggen ine Conrad Sangma aganangaha.
