Fair Price Shop (FPS) ni dealer Baharul Islam jekon National Food Security (NFS) ni ning∙o man∙gipa merongrangko jagnina on∙gija skatang dake jakkalsretani gimin songni Sordar Islam Hoque Choudhary uni kosako badi ka∙angaha.
West Garo Hills a∙jani ning∙o Dadenggreni SDO na Islam ni see janapatani gitade, Baharul NFSA ni ning∙o man∙a nanggipa nokdangrangna February aro June jani merongrangko sokatjaha. Islam ni FPS dealer licence ko bonatchina aro jakkandilgiparang uko badi ka∙e am∙sandianiko dakchinaba janapangaha. Garodubi songo chu∙gimik 1529 NFSA ni ning∙o man∙a nanggipa manderang dongachim. Bahurul-na skang dealer ong∙gipako apsan daken jakkalsretani a∙selo ra∙gale 2018 bilsio Baharul dealer ong∙aniko man∙rikskaaha. Uko uamang seoka ong∙ja, indiba maibakai SDO office-nigita man∙rikskaaha ine Islam chittio janapataha. Uni kosako bang∙a dilgiparangna matnanganirangkoba dakaha, uko uamang knachakgija dongaiaha ineba parakataha. Jagnina chamatgipa 149 quintalrangko sualgija jakkalsrete gimaataha unbaksana sakprakna chamgiminoniko atha kg ko merong salbaani korosna sorkari chamata ine tol∙e ra∙rikrongachim ine Choudhury aganaha.
Sigimin manderangni bimingrangoba merongrangko ra∙kuenga aro songni manderang uni kosako matnange aganode uamangni ration card ko bon∙atgen ine ka∙mikkenatronga ine u∙iataha. Ia kamrangara namgijagipa aro NFSA ni niamni a∙palo ong∙a ine Gaonbura agandapangaha. Uni namgijagipa kamrangna dealer ni licence ko bon∙atna nangchongmota aro niamrango pangchake una kraa sastiko on∙a nanga ine Choudhury aganangaha.
